کتێبی “ڕاسی” ناوچەی لەیلاخ، بەرهەمی “٨” ساڵ هەوڵ و ماندبوون و کۆکردنەوەی توێژەری فۆلکلۆری کوردی، مامۆستا ئیبراهیم ئەحمەدییە کە لەلایەن توێژینگەی کوردستان‌ناسیی زانکۆی کوردستانەوە خرایە بەردەستی خوێنەران و تامەزرۆیانی فۆلکلۆر و ئەدەبی کوردی.
کتێبی “ڕاس” لە لایەن توێژینگەی کوردستان‌ناسی زانکۆی کوردستانەوە چاپ و بڵاو کرایەوە
بە پێی ڕاپۆرتی ماڵپەڕی توێژینگەی کوردستان ناسیی زانکۆی کوردستان کتێبی “ڕاسی” ناوچەی لەیلاخ، بەرهەمی “٨” ساڵ هەوڵ و ماندبوون و کۆکردنەوەی توێژەری فۆلکلۆری کوردی، مامۆستا ئیبراهیم ئەحمەدییە کە لەلایەن توێژینگەی کوردستان‌ناسیی زانکۆی کوردستانەوە خرایە بەردەستی خوێنەران و تامەزرۆیانی فۆلکلۆر و ئەدەبی کوردی.
ئەم کتێبە سەرەتا وەکوو پڕۆژەیەکی توێژینەوەیی لەلایەن توێژینگەی کوردستان‌ناسیەوە پەسەند کرا، کە دواتر بە شێوازی کتێب و لە سێ بەرگدا چاپ بڵاوکرایەوە. گرووپی توێژینەوەیی زمان‌ناسی و ئەدەبی کوردیی توێژینگەی کوردستان‌ناسی بە بەرپرسایەتی دوکتۆر هادی ڕزوان وەکوو خانەخوێی ئەم پڕۆژەیە لە دوای هەڵسەنگاندن و لێکدانەوەی؛ لەلایەن دەستەی بەڕێوەبەرایەتیی گرووپی توێژینەوەیی زمان‌ناسی و ئەدەبی کوردی وەکوو پڕۆژەیەکی توێژینەوەیی پەسەند کرا و لە دوای پەسەند کردنی کۆتایی ئەم پڕۆژەیە، لەلایەن سەرۆکی کاتیی توێژینگەی کوردستان‌ناسیی زانکۆی کوردستان، دوکتۆر ئومید قادرزادە پەسەندی کۆتایی کرا و دواتر بە مەبەستی ئامادەکردنی پڕۆژەکە بە شێوەیەکی ئاکادێمی و زانستی و هەروەها بە مەبەستی ئامادەکردنی بە شێوازی کتێب، دوکتۆر سدیق زاهێدی پسپۆڕ و شارەزای زمانی کوردی، ئەرکی پێداچوونەوەی پسپۆڕانەی زمانی و فەننی کتێبەکەی لە ئەستۆ گرت کە بە شێوازێکی ئاکادێمیک و زانستییانە بەرهەمەکەیان نڤیسیاری کرد. لە دوای ئەم قۆناغە لەلایەن مامۆستا نەجمەدین براخاسی نڤیسیاری بۆ کرا. لە کۆتاییدا و لە ساڵی “1399” ئامادەکارییەکان بۆ چاپ و بڵاو بوونەوەی ئەم کتێبە گەیشتە کۆتاییەکانی خۆی و لەلایەن دوکتۆر بێهرووز چەمەن‌ئارا، سەرۆکی کاتیی توێژینگەی کوردستان‌ناسیی زانکۆی کوردستان، پێشەکی لەسەر نووسەرا و بڵاوکەرەوەی توێژینگەی کوردستان‌ناسی زانکۆی کوردستان ئەرکی چاپ و بڵاو کردنەوەی ئەم بەرهەمە ناوازەیەی لە ئەستۆ گرت. ئەم کتێبە سێ بەرگییە کە “١٧٠٠”لاپەڕەیە، پێکهاتووە لە چیرۆک و ئەفسانەگەلی ناوچەی لەیلاخ کە “337” چیرۆکی لە خۆگرتووە کە بۆ وتنەوەی ئەم چیرۆک و ئەفسانەگەلە” 106″ حیکایەت بێژ و ڕاس‌بێژی ناوچەی لەیلاخ بەشدارییان کردووە کە بوونەتە هەوێنێک بۆ بەپێزترکردنی ئەم بەرهەمە و گەیانێکی دووبارە بە ڕۆحی فۆلکلۆری کوردی دا. چیرۆک و ئەفسانە ڕەنگدانەوەی بیر و باوەڕ، هیوا و ئاواتەکانی خەڵکن و سینگ بە سینگ و بەرەبەرە گوێزراونەتەوە و پاڵ‌پشتی پتەوی ئەدەبی ئاکاری و کۆمەڵایەتین. ناوەرۆکیان پڕە لە بنەماکانی دۆستی و دادپەرەوەری و ڕنگدانەوەی ژیانی کۆمەڵایەتین و کۆمەڵێک جیهان‌بینی خەڵکییان لە نێو دڵی خۆیاندا حەشار داوە. هەر بەم هۆیەوه، لە ڕوانگەی جۆربەجۆرەوە وەکوو دەروونناسی، و جیاوازییە زمانییەکان و کۆمەڵناسی، دەتوانین لێکیان بدەینەوە. هەروەها، کلیلی دۆزینەوەی باوەڕەکان و فەرهەنگی نەتەوەیین و لە ڕاستیدا، چیرۆکەکان ناسنامە و شوناسی فەرهەنگی هەر نەتەوەیەکن کە لە خەساری جۆربەجۆری شاڵاوی عەسکەری و هزری توانیویانە خۆیان بپارێزن. کە بە خۆشحاڵییەوە ئەم کتێبە توانیویەتی بە جوانی و بە پێی مێتۆدێکی زانستییانە ئەم چەمکانەی لە خۆگرتووە و بووەتە هۆی ڕسکاندنی بەرهەمێکی بەپێز کە ئێستا لەبەر دەستی ئێوەی خوێنەری هێژادایە.
جێی ئاماژەیە کە مامۆستا ئیبراهیم ئەحمەدی، وەکوو نووسەرێکی دیار و ماندوویی‌نەناسی بواری فۆلکلۆری کوردی، بەردەوام هەوڵەکانی لە ڕێگای خزمەت بە زمان و وێژەی کوردی دا خستۆتە گەڕ و ئەم بەڕێزە تێکۆشەرە خاوەنی خەرمانێکی بە پیتە لە کۆمەڵێک کتێب لەو بوارەدا کە پێشکەشی کتێبخانەی کوردیی کردووە کە لە خوارەوەدا ئاماژەیان پێ دەکرێت.
١-فەرهەنگی کینایە، چاپی زانکۆی کوردستان١٣٨٦.
٢-فەرهەنگی لێکچواندن(تشبیە)لە پەندی پیشینیان وقسەی نەستەقدا؛ چاپەمەنی غەزاڵی١٣٨٨ .
٣-فەرهەنگی دەنگەناو لە زمانی کوردیدا، چاپەمەنی غەزاڵی١٣٨٨
٤—ئەوە چییە (چیستان)؛ مەتەڵ بۆمنداڵان؛ چاپەمەنی کالج١٣٩٣
٥-فەرهەنگی زیوەری زمان، زانکۆی ئازادی ئیسلامی کوردستان١٣٩٣
٦-فەرهەنگی مەتەڵ(چیستان،لیچار،معما)چاپ و بڵاو کردنەوەی کالج ١٣٩٣
٧-پێکهاتەی ئەفسانەی پەریانی کوردی( بەم زووانە لە چاپ دەدرێ).
