ژمارەی ٦ی گۆڤاری زانستیی هۆژین: دەروازەیەک بەرەو جیهانی زانست بۆ منداڵانی کوردستان! دیارییەک بۆ هەمیشە، خەڵاتێک بۆ ئێستا و دەستپێکێک بۆ داهاتوو
ژمارەی ٦ی گۆڤاری زانستیی هۆژین: دەروازەیەک بەرەو جیهانی زانست بۆ منداڵانی کوردستان!
دیارییەک بۆ هەمیشە، خەڵاتێک بۆ ئێستا و دەستپێکێک بۆ داهاتوو
بە خۆشحاڵییەکی زۆرەوە، ڕێکخراوەی زانستیی هۆژان جارێکی دیکە بە دیارییەکی ناوازە و پڕبایەخەوە جیهانی منداڵان ڕەنگین و زەنگین دەکاتەوە، کە ئەمجارەیان بە تایبەتی بۆ ڕۆڵە و زارۆکە خۆشەویستەکانی کوردستان تەرخان کراوە. ئەم دیارییە بریتییە لە «ژمارەی ٦ی گۆڤاری زانستیی هۆژین ــ پاشکۆی منداڵانە»، کە بە ناوەڕۆکێکی دەوڵەمەند و جیاواز، ئێستا لە بەردەستی هەموواندایە و دەروازەیەک بەرەو جیهانی پڕ لە زانست و زانیاری دەکاتەوە.
ئەم ژمارە تایبەتە، کە بە وریایی و دڵسۆزییەوە ئامادەکراوە بۆ گەشەپێدانی توانای زانستی و فیکری منداڵان، لە ئێستادا لە سەرجەم ناوەندەکانی فرۆش و بڵاوگەکانی کتێب بەردەستە. هەروەها، بۆ ئاسانکاری زیاتر، بە شێوەی سەرهێڵ (مەجازی) لە ماڵپەر و پەیجەکانی هۆژاندا لەبەردەستە.
ئەم دەستپێشخەرییە نوێیە هەوڵێکی گەورەیە بۆ ئەوەی زانست بە زمانی کوردیی ڕەسەن و خۆماڵی، بە شێوەیەکی شیرین و ئاسان، بگاتە دەستی منداڵان و بیانکاتە هاوڕێی هەمیشەیی دنیای خوێنشیرینی زانست.
ناوەڕۆکێکی دەوڵەمەند و سەرنجڕاکێش بۆ گەشەی فیکری منداڵان
ژمارەی ٦ی گۆڤاری زانستیی هۆژین ــ پاشکۆی منداڵانە، کۆمەڵێک بابەتی زانستی و پەروەردەیی هەمەچەشن لەخۆدەگرێت کە بە شێوەیەکی سادە، ڕوون و سەرنجڕاکێش ئامادەکراون بۆ ئەوەی منداڵان بە چێژ و خۆشییەوە فێری زانست ببن و توانای بیرکردنەوەی ڕەخنەییان گەشە پێبدرێت. لە دیارترین بابەتەکانی ئەم ژمارەیە بریتین لە:
•سروشت و بیرکاری، زنجیرەی فیبۆناچی و سروشت: گەشتێکی زانستیی سەرنجڕاکێش بە نێو پەیوەندییە نهێنی و سەرسوڕهێنەرەکانی بیرکاری و سروشتدا، کە چۆن ژمارەکان لە دەوروبەرماندا خۆیان حەشارداوە.
•ژیانی ڕۆژانە و بیرکاری، کاتی سازکردنی کەیکێکی بەتامە: فێربوونی بنەماکانی بیرکاری لە ڕێگەی چالاکییە خۆش و پراکتیکییەکانی ژیانی ڕۆژانەوە، وەک سازکردنی کەیکێکی بەتام.
•قاچ و دەستیان ببینە و ئاژەڵەکان بناسەوە: ناساندنی جیهانی پڕ لە ڕەنگ و جۆراوجۆری ئاژەڵان بە شێوەیەکی فێرکاری و سەرگەرمکەر، کە منداڵان فێری ناسینەوەی جۆرە جیاوازەکانی ئاژەڵ دەکات.
•یانەو وێما: هەسارەێ زەمینی: زانیاریی ورد و گرنگ دەربارەی هەسارەی زەوی، ماڵە گەورەکەمان، و گرنگی پاراستنی بۆ نەوەکانی داهاتوو.
•بەڕوو، هاوڕێی دارستانی سەوز: ناساندنی بەڕوو و ڕۆڵی گرنگی لە ژینگەی دارستاندا، هەروەها چۆنیەتی پاراستنی دارستانەکان.
•ئەندازیاری بچووک و خەونی گەورە: سازکردنی دەستی ڕۆبۆتی!: هاندانی منداڵان بۆ بیرکردنەوەی داهێنەرانە و ئەندازیاری، لە ڕێگەی پڕۆژەیەکی پراکتیکی وەک سازکردنی دەستی ڕۆبۆتی.
•نۆرۆنەکان ڕێڕەوی جادوویی ناو مێشک: گەشتێکی خێرا بە نێو مێشکی مرۆڤ و ناسینی نۆرۆنەکان، ئەو خانە بچووکانەی کە هەموو بیرکردنەوە و هەستەکانمان کۆنتڕۆڵ دەکەن.
•دایناسۆرەکان چییان بەسەر هات؟: وەڵامدانەوەی پرسیارێکی سەرنجڕاکێش و پڕ نهێنی دەربارەی دایناسۆرەکان و هۆکارەکانی لەناوچوونیان.هۆژان هیواخوازە ئەم ژمارە تایبەتە ببێتە سەرچاوەیەکی بەنرخ و هاندەر بۆ منداڵانی کوردستان، بۆ ئەوەی بە زمانی دایکی خۆیان، تامی ترش و شیرین و مزری زانست بچێژن و ببنە هاوڕێی هەمیشەیی دنیای خوێنشیرینی زانست. با پێکەوە نەوەیەکی زانا و داهێنەر دروست بکەین!
