کاتێک مردنێک ڕوودەدات، منداڵان دەیانەوێت دەربارەی قسە بکەن و دەیانەوێت دایک و باوکیشیان تێوەگلێنن لە گفتوگۆکەدا. دەیانەوێت ئەوان بزانن کە منداڵانیش دەتوانن مردن تێبگەن.
گفتوگۆ لەگەڵ منداڵان دەربارەی مردن مورتەزا بەراتی
کاتێک مردنێک ڕوودەدات، منداڵان دەیانەوێت دەربارەی قسە بکەن و دەیانەوێت دایک و باوکیشیان تێوەگلێنن لە گفتوگۆکەدا. دەیانەوێت ئەوان بزانن کە منداڵانیش دەتوانن مردن تێبگەن. منداڵان پێویستیان بە وەڵامی سادە و ڕاستەوخۆ و دەرفەتێک هەیە بۆ هاوبەشکردنی هەست و بیرەکانیان لەم بارەیەوە.چوار چەمکی گرنگ دەربارەی مردن کە تێگەیشتن لێیان بۆ هەر منداڵێک گرنگ و حەیاتییە:
١. مردن گەڕانەوەی نییە
ئێمە زۆرجار ڕستەی لەم شێوەیە بە منداڵان دەڵێین: "ئەو چووەتە شوێنێکی دوور" یان "چووەتە سەر هەورەکان". ئەم ڕستانە ئەوە دەگەیەنن کە کەسە مردووەکە دەگەڕێتەوە. لەم حاڵەتەدا منداڵان لەوانەیە چاوەڕێی بکەن و ئەگەر نەگەڕایەوە، لێی بێزار دەبن. ئەوان دەبێت تێبگەن کە مردن گەڕانەوەی نییە.
٢. دوای مردن، هەموو کارکردەکانی ژیان بە تەواوی کۆتایی دێت.
دەبێت بزانن کە جەستەی کەسەکە چیتر کار ناکات و بیر و هەستی نییە. ئەگینا، منداڵان لەوانەیە نیگەران بن کە کەسە مردووەکە هێشتا ئازاری هەیە یان خەمبار و برسی و ... هتد.ە.
٣. مردن حەتمی و لێی دەربازبوون نییە.
منداڵان دەبێت بزانن کە هەر بوونەوەرێکی زیندوو لە کۆتاییدا دەمرێت. کاتێک لەگەڵ منداڵان دەربارەی مردن قسە دەکەین، حەز دەکەین بڵێین: "من هەرگیز نامرم و بە تەنیا جێت ناهێڵم"، "هەمیشە لەگەڵت دەبم و لێرە دەبم". بەڵام ئەمە دەبێتە هۆی سەرلێشێواوی و دڵەڕاوکێی منداڵەکە. ئەگەر منداڵان وا بیر بکەنەوە کە هەندێک کەس نامرن، بۆ ئەوان بەو واتایەیە کە ئەوانەی مردوون هەڵبژێردراون بۆ مردن چونکە لەوانەیە کارێکی هەڵە و نادروستیان کردبێت. ئەوان دەبێت تێبگەن کە مردن بەشێکە لە سووڕی ژیان.٤. هۆکاری مردن ڕوون بکەرەوە.
لە کاتێکدا پێویست ناکات زانیاری و وردەکاری زۆر دەربارەی مردنی کەسێک لەگەڵ منداڵان هاوبەش بکەین، بەڵام ڕوونکردنەوەی چۆنیەتی و بۆچییەتی مردنی کەسێک وادەکات منداڵان کەمتر بترسن یان هەست بە تاوان بکەن. پێویستە منداڵان هۆکاری فیزیکی مردنی کەسێک تێبگەن. هەستی تاوانباریش کاردانەوەیەکی باوی گشتگیرە بۆ مردنی کەسێک. منداڵان لەوانەیە وا بیر بکەنەوە کە من کارێکی هەڵەم کردووە و ئەمە بووە هۆی مردنی کەسێک کە خۆشم دەویست و ئەمەش بەو واتایەیە کە نابێت ئەم کارە دووبارە بکەمەوە تا ئەم ڕووداوە ڕوونەدات.
