ئەگەر مامۆستاکان و ماستەرەکان و دوکتۆرانمان و هەروەها وەزارەتی پەروەردە، بەپێی ئەم فۆرمۆلە سادەیە ناوی قوتابخانەکان و شوێنەکان دابڕێژنەوە، گەورەترین کێشەی تایپۆلۆجیمان چارەسەر دەبێت:
فۆرمۆلی داڕشتنی ناونانی قوتابخانە/شوێنەکان
دیاکۆ هاشمی
ئەگەر مامۆستاکان و ماستەرەکان و دوکتۆرانمان و هەروەها وەزارەتی پەروەردە، بەپێی ئەم فۆرمۆلە سادەیە ناوی قوتابخانەکان و شوێنەکان دابڕێژنەوە، گەورەترین کێشەی تایپۆلۆجیمان چارەسەر دەبێت:
ناو + ی + هاوەڵناو + ی + ناوی شوێن
هەناری شیرینی هەورامان (نەک هەناری هەورامانی شیرین)
زانکۆی پزیشکیی هەولێر (نەک زانکۆی هەولێری پزیشکی)
ئامادەییی زانستیی کچانەی شۆڕش (نەک ئامادەیی شۆڕشی زانستی کچان)
***
شەقڵاوە پێشەنگە لە پاراستنی زمانی کوردی!
قائیممەقامی شەقڵاوە بەپێی فەرمانێکی فەرمی (ژمارە ٧١٤، ٢٠٢٣/٤/٣٠) ناوی قوتابخانەکانی بەپێی داڕشتنی کوردی ڕاست کردووەتەوە، ئەم هەنگاوە گرنگە پەیامێکە بۆ بایەخدان بە زمانی کوردی. دەستخۆشی لە قائیممەقامی قەزای شەقڵاوە کاک "کاروان کەریم خان" و هەموو هاوکاران دەکەین و هیوادارین ببێتە ئیلهام بۆ هەموو کوردستان بۆ ڕاستکردنەوەی ناوی قوتابخانەکان بە شێوەی ستاندارد، چونکە زمان کێیەتیمانە.
خۆ ئەگەریش لەسەر تابلۆکاندا سێ "ی" (ییی) نەنووسرێت، چونکە قورسە و جێی زۆر دەگرێت، هێشتا هیچ کێشەیەک نییە، گرنگ ئەوەیە داڕشتنەکە کوردییانە بێت. (بەڵام لە زمانی ستاندارد و دەقی ئەکادیمیدا زۆر گرنگە). لە شەقڵاوە، لەبەر قورسی و درێژی، لەسەر تابلۆکاندا سێ "ی" (ییی) بەکار نەهێنراوە، بەڵام هەموو داڕشتنەکە کوردییانەیە، ئەوە گرنگە و دەستیان خۆش بێت:
لە قەزای شەقڵاوە بۆ نموونە ئەم ناوانە بەم جۆرە ڕاست کراونەتەوە:
قوتابخانەی بنەڕەتیی تێکەڵاوی ڕووساک
قوتابخانەی بنەڕەتیی تێکەڵاوی پێزان
قوتابخانەی بنەڕەتیی تێکەڵاوی (صافی)
قوتابخانەی بنەڕەتیی تێکەڵاوی (نێرگز)
قوتابخانەی بنەڕەتیی تێکەڵاوی زەیتوون
قوتابخانەی بنەڕەتیی تێکەڵاوی بێترمە
ئامادەیی کچانەی بەردەقارەمان
دواناوەندیی ئێوارانی کوڕانەی ڕووناکی
ئامادەیی کچانەی شەقڵاوە
نوخشە بێت لە هەموو قوتابخانەکانی سەرانسەری کوردستان.
