سنە - د. عەلی‌ئەکبەر موزەفەری، جێگری توێژینەوەیی زانکۆی کوردستان، هەواڵی بڵاوکردنەوەی کۆمەڵەکتێبێکی منداڵان لەم زانکۆیەدا ڕاگەیاند. بە وتەی ناوبراو، ئەم بەرهەمانە بە پاڵپشتیی زانستی و توێژینەوەیی زانکۆی کوردستان نووسراون، بڵاو کراونەتەوە و لە داهاتوویەکی نزیک و لە ڕێوڕەسمێکی فەرمیدا پەردەیان لەسەر لادەدرێت.
بڵاوکردنەوەی کۆمەڵەکتێبێکی منداڵان لە زانکۆی کوردستان
سنە - د. عەلی‌ئەکبەر موزەفەری، جێگری توێژینەوەیی زانکۆی کوردستان، هەواڵی بڵاوکردنەوەی کۆمەڵەکتێبێکی منداڵان لەم زانکۆیەدا ڕاگەیاند. بە وتەی ناوبراو، ئەم بەرهەمانە بە پاڵپشتیی زانستی و توێژینەوەیی زانکۆی کوردستان نووسراون، بڵاو کراونەتەوە و لە داهاتوویەکی نزیک و لە ڕێوڕەسمێکی فەرمیدا پەردەیان لەسەر لادەدرێت.
جێگری توێژینەوەیی زانکۆی کوردستان هیوای خواست کە کۆمەڵەکتێبی بڵاوکراوەی بواری منداڵان، هەنگاوێکی کاریگەر لە ڕاستای فراوانکردنی سەرچاوەکان بۆ منداڵان و تازەلاوان و هەروەها پەرەپێدانی پێگەی ئەدەبی منداڵان لە زمانی کوردیدا بێ.
هەر لەم ڕووەوە، ئارش مێهرەبان، بەرپرسی کارگرووپی توێژینەوەی ئەدەبی منداڵانی زانکۆی کوردستان، وتی: ئەم بەرهەمانە، کۆمەڵەکتێبێکی منداڵان لە بوارەکانی شیعر، وەرگێڕان و پەخشانن کە بە زمانی کوردی نووسراون و لە داهاتوویەکی نزیکدا پەردەیان لەسەر لادەدرێت.
بەرپرس و دامەزرێنەری گرووپی توێژینەوەی ئەدەبی منداڵانی توێژینگەی کوردستان‌ناسیی زانکۆی کوردستان له درێژەی قسەکانیدا وتی: ئەم کارگرووپە نزیکەی دوو ساڵە بە پاڵپشتیی توێژینگه‌ی کوردستان‌ناسیی زانکۆی کوردستان دامەزراوە و تا ئێستاش چەندین وێبیناری پسپۆڕانەی ئەم بوارە، بە بەشداریی توێژەران و نووسەرانی ئەدەبی منداڵان بەڕێوە چووە. لە داهاتووشدا کار و چالاکیی زیاتر لەو بوارەدا ئەنجام دەدرێت.
