بەرپرسی زانستیی خەڵاتی قەڵەمی هەژار باسی لە بەشی ١١لەسەدیی کتێبی تایبەت بە منداڵ لەم خەڵاتەدا کرد وتی: ئەم ڕێژەیە، پیشاندەری گەشەی چەندێتی و چۆنیەتیی توێژینەوەکان و بەرهەمەکانی ئەم بوارەیە.
بەشی ١١ لەسەدیی ئەدەبی منداڵ لە خەڵاتی قەڵەمی هەژار
بەرپرسی زانستیی خەڵاتی قەڵەمی هەژار باسی لە بەشی ١١لەسەدیی کتێبی تایبەت بە منداڵ لەم خەڵاتەدا کرد وتی: ئەم ڕێژەیە، پیشاندەری گەشەی چەندێتی و چۆنیەتیی توێژینەوەکان و بەرهەمەکانی ئەم بوارەیە.
لە ڕێوڕەسمی کۆبوونەوەی ڕۆژنامەوانیی خەڵاتی قەڵەمی هەژار کە ڕۆژی یەکشەممە ٤ی جۆزەردانی ١٤٠٤ی هەتاوی لە هۆڵی فیردەوسیی زانکۆی کوردستاندا بەڕێوەچوو، نووسینگەی ئەم خەڵاتە بەباسکردنی هەژمارێکی فەرمی لە ڕەوتی بەڕێوەچوونی ئەم خەڵاتە، کۆمەڵێک زانیاریی نوێی سەبارەت بە تەوەر و بەرهەمە نێردراوەکان پێشکەش کرد؛ هەژمارێک کە پیشاندەری بەشداریی بەرچاوی بەرهەمی تایبەت بە ئەدەبی منداڵە.
بە وتەی بەرپرسی زانستیی خەڵاتی قەڵەمی هەژار، لە یەکەمین خولی ئەم خەڵاتەدا کە بەجەخت لەسەر لێکۆڵینەوەی کوردی و لە ١٥ تەوەری تایبەتدا بەڕێوە دەچێت، ١١ لەسەدی ئەو بەرهەمانەی بۆ ئەم خەڵاتە نێردراون، تایبەت بە ئەدەبی منداڵە کە ئەم ڕێژەیە پیشاندەری گەشەی چەندێتی و چۆنیەتیی توێژینەوەکان و بەرهەمەکانی ئەم بوارەیە.
ئەو هەروەها وتی: ئەم ڕێژەیە جێی سەرنجە و ئەدەبی منداڵی کردووە بە یەکێک لەو تەوەرە دیارانەی خەڵاتی قەڵەمی هەژار.
هەڵبژاردنی هەڵسەنگێنەران لەنێوان کەسایەتیگەلی زانستی و زانکۆیی
لەم کۆبوونەوەی ڕۆژنامەوانییەدا ڕاگەیەندرا کە بۆ هەڵسەنگاندنی بەرهەمەکان، کەڵک لە داوەرگەلێک وەرگیراوە کە خاوەن پێشینەیەکی زانکۆیی، توێژینەوەیی و پسپۆڕانەن. بە وتەی بەرپرسی خەڵات، هەڵسەنگاندنی بەرهەمەکان بە سەرنج و هەستیارییەکی زۆرەوە ئەنجام بووە و تەواوی بەرهەمەکان لە ڕەوتێکی زانستیدا هەڵسەنگاندنیان بۆ کراوە.
ڕێزلێنان لە ٣٨ بەرهەم؛ ٦ خەڵاتی تایبەت، ٣٢ بەرهەمی شایانی ڕێز
بەپێی ڕاگەیاندنی فەرمیی نووسینگەی خەڵاتی هەژار، ٦ بەرهەم وەکوو وەکوو هەڵبژرادەی کۆتایی دەناسێنرێن کە هەرکام لەمانە خەڵاتی تایبەتی قەڵەمی هەژار وەردەگرن. هەروەها ٣٢ بەرهەمی دیکە وەکوو بەرهەمی شایانی ڕێز لە ڕێوڕەسمی کۆتایی ئەم خەڵاتەدا دەناسێنرێن.
جێی ئاماژەیە ڕێوڕەسمی کۆتایی خەڵاتی قەڵەمی هەژار لە ڕۆژانی ٧ و ٨ی جۆزەردانی ١٤٠٤ بە ئامادەبوونی هەڵکەوتووان، نووسەران، زانکۆییەکان و میدیاکاران لە زانکۆی کوردستاندا بەڕێوە دەچێت.
