لەم ساڵانەی دواییدا، بەهۆی کەمبوونەوەی بووجەی فێرکاریی و نەبوونی پارەی پێویست بۆ نۆژەنکردنەوەی قوتابخانەکان، خەڵک و خێرخوازان بە شێوازێکی خۆبەخش دەستیان داوە بە دەستی یەکەوە و بەمەبەستی باشترکردنی کەشی فێرکاری لە قوتابخانەکاندا، لە هیچ هەوڵێک درێغیان نەکردووە.
ڕەنگی هیواکان
لەم ساڵانەی دواییدا، بەهۆی کەمبوونەوەی بووجەی فێرکاریی و نەبوونی پارەی پێویست بۆ نۆژەنکردنەوەی قوتابخانەکان، خەڵک و خێرخوازان بە شێوازێکی خۆبەخش دەستیان داوە بە دەستی یەکەوە و بەمەبەستی باشترکردنی کەشی فێرکاری لە قوتابخانەکاندا، لە هیچ هەوڵێک درێغیان نەکردووە.
لەم نێوانەدا، چالاکیگەلێکی داهێنەرانە و فەرهەنگیی هەندێ کەس، ڕۆڵێکی گرینگی بووە لە دروستکردنی کەشێکی جوان و شیاو لە قوتابخانەکان و باشترکردنی ڕۆحیەی قوتابییەکان.
فەریدە شاکری، شاعیری ئەدەبی منداڵ و تازەلاو لە شاری کانی دیناری مەریوان، یەکێکە لەو کەسایەتییە کاریگەرانە لەم بوارەدا. ئەو بە ورەو و لێهاتوییەکی زۆرەوە بەبێ هیچ جۆرە چاوەڕوانییەکی مادی، خۆبەخشانە دەستی داوەتە ڕەنگکردنی دیوار و پۆلەکانی قوتابخانەی ناوچە پەراوێزخراوەکان. ئەم شاعیرە داهێنەرە، بەکەڵکوەرگرتن لە تەرحگەلێکی فانتێزی و منداڵانە، کەشێکی جوانی بۆ منداڵان خولقاندووە کە پڕە لە ڕەنگ، هێز، وەرە، خەیاڵ و فانتێزی.
خاتوو فەریدە شاکری تاهەنووکە چەندین قوتابخانەی لە شاری مەریواندا ڕەنگکردوە و خۆشی و ئومێدی گەڕاندووتەوە نێو قوتابخانەکان. جیا لەمە ئەم خاتوونە داهێنەرە، لە بواری شێعری منداڵاندا بەرهەمگەلێکی جوان و بەبایەخی هەیە کە لە فێستیواڵەکاندا سەرکەوتنی بەدەست هێناوە.
ئەم هەوڵە بەیایەخە، نموونەیەکی جوانە لە پەیوەندیی نێوان هونەر، ئەدەبیات و بەرپرسیاریەتیی کۆمەڵایەتی؛ هەوڵێکە بۆ ئەوەی کە منداڵان تەنانەت لە پەراوێزخراوترین شوێنەکانیشدا، خەیاڵ و خەونەکانیان لەو پۆلانەدا پێوشوێن بگرن کە ڕەنگین و پڕن لە ئومێد و هیوا.
