هاوکات لەگەڵ بەڕێوەچوونی فێستیواڵی سەراسەریی چیرۆکی کوردی لە مەهاباد، کارگەی چیرۆکنووسیی تایبەت بە منداڵان و تازەلاوان لە لایەن گرووپی "هۆزانی هونەر" و بە هاوکاریی ئەنجومەنی فەرهەنگی هونەریی موکریانی مەهاباد بەڕێوەچوو.
کارگەی فێرکاریی چیرۆکنووسی بۆ منداڵان و تازەلاوان لە مەهاباد بەڕێوەچوو
هاوکات لەگەڵ بەڕێوەچوونی فێستیواڵی سەراسەریی چیرۆکی کوردی لە مەهاباد، کارگەی چیرۆکنووسیی تایبەت بە منداڵان و تازەلاوان لە لایەن گرووپی "هۆزانی هونەر" و بە هاوکاریی ئەنجومەنی فەرهەنگی هونەریی موکریانی مەهاباد بەڕێوەچوو.
بەپێی ڕاپۆرتی هاژە، ئەم کارگەیە کە لە چوارچێوەی دوو قۆناغی فێرکاریی و تیۆری و کردەییدا بە ماوەی دوو ڕۆژ بەڕێوەچوو، لەلایەن منداڵان، تازەلاوان و بنەماڵەکانیانەوە پێشوازییەکی بەرچاوی لێکرا. لەم بەرنامەیەدا، ئارش مێهرەبان و گوڵاڵەستاوەند، دوو وانەبێژی بواری ئەدەبی منداڵ و شێوەکاری، پەرژانە سەر بابەتگەلێک وەکوو چەمکە بنەماییەکانی چیرۆکنووسی، شێوازەکانی نووسین و بنەماکانی دروستکردنی بیرۆکەی داهێنەرانە و شێوەکاریی کتێبی منداڵان.
ئارش مێهرەبان وانەبێژی ئەم کارگەیە، لە پەراوێزی کارگەکەدا و لە وتووێژی لەگەڵ ماڵپەڕی هاژە، لەسەر گرینگایەتیی بایەخدان بە منداڵان و تازەلاوان وەکوو بەردەنگگەلی جیددی لە بواری ئەدەبیاتدا جەختی کردەوە و زیادی کرد: یەکێک لەو کارە بەنرخانەی فێستیواڵی چیرۆکنووسیی کوردیی مەهاباد، تایبەتکردنی بەشێکی تایبەت بە منداڵان و تازەلاوان بوو. بەڕێوەبردنی ئەم کارگانەش لەم ئاراستەیەدا بەڕێوەچوو."
ئەو لە درێژەدا وتی: ئامانج لە بەڕێوەبردنی ئەم خولانە، ئاشناکردنی منداڵان و تازەلاوان لەگەڵ ڕەوتی نووسینی چیرۆک و باشترکردنی لێهاتووییەکانیانە لە بواری نووسین و داهێناندا. بەشێک لەم خولە بە شێوازی کردەیی بەڕێوەچوو تا منداڵانی بەشداربوو تەجروبەیەکی ڕاستەقینەیان بێت لەمەڕ نووسینی چیرۆکگەلێکی فانتێزی و منداڵانەدا."
ئەم کارگەیە بە نووسینی چیرۆکگەلێکی کورت لەلایەن بەشداربووانی مێرمنداڵ و پێشکەشکردنی مۆسیقا لەلایەن گرووپی هونەریی قوتابخانەی ناوەندیی هەڵکەوتووانی شەهید بەهەشتی١ی مەهاباد کۆتایی پێهات.
