کەمخوێنی یەکێک لە باوترینی ئەو گرفتە خۆراکیانەیە کە بەزۆری بەهۆی کەمبوونی ئاسنی لەشەوە سەر هەڵدەدات. ئەم گرفتە، بەپڕانی، لە منداڵانی خوار تەمەن پێنج ساڵدا دەردەکەوێت، و ئەگەر لە کاتی خۆیدا دەستنیشان و چارەسەر نەکرێت، ڕەنگە کارتێکردنێکی قەرەبوونەکراو لەسەر گەشەی جەستەیی، تێگەیینی و ئاکاریی منداڵی تووشبوو دابنێت.
کەمخوێنی لە منداڵاندا؛ نەخۆشییەکی شاراوە
کەمخوێنی یەکێک لە باوترینی ئەو گرفتە خۆراکیانەیە کە بەزۆری بەهۆی کەمبوونی ئاسنی لەشەوە سەر هەڵدەدات. ئەم گرفتە، بەپڕانی، لە منداڵانی خوار تەمەن پێنج ساڵدا دەردەکەوێت، و ئەگەر لە کاتی خۆیدا دەستنیشان و چارەسەر نەکرێت، ڕەنگە کارتێکردنێکی قەرەبوونەکراو لەسەر گەشەی جەستەیی، تێگەیینی و ئاکاریی منداڵی تووشبوو دابنێت.
ئاسن، بە یەکێک لە کانزا هەر گرینگەکان بۆ لەشی مرۆڤ دادەنرێت. ئەم کانزایە دەورێکی گرنگی لە دروستکردنی هیمۆگلۆبین و گەیاندنی ئۆکسجین بۆ خانەکانی لەش هەیە، هەر بەم هۆیەوە ئەگەر ڕێژەکەی لە ئاستی دیاریکراو کەمتر بێت، ئەوا مرۆڤ تووشی کەمخوێنی دەبێت.
هەر وەک پێشتر ئاماژەی پێ کرا، منداڵانی خوار تەمەن پێنج ساڵ زیاتر لە گرووپە تەمەنییەکانی دیکە تووشی ئەم نەخۆشییە دەبن. ئەوان بەهۆی گەشەی خێرای جەستەیانەوە، ڕێژەیەکی زۆرتر لە کانزای ئاسنیان پێویستە. هەر لەم سۆنگەوە کەم‌خۆراکی، درەنگ یان نادروست دەستپێکردنی تەواوکەرە خۆراکییەکان و بەکارهێنانی بەردەوامی شیری مانگا لە تەمەنی خوار یەک ساڵیدا دەتوانن ببنە هۆکاری سەرهەڵدانی کەمخوێنی تێیاندا.
نیشانەکانی ئەم جۆرە لە کەمخوێنی (بەهۆی کەمبوونی ئاسنەوە) لەوانەیە لە سەرەتادا نادیار یاخود گشتی بن؛ وەک بێ‌ئۆقرەیی، کەم‌ئیشتیایی، ڕەنگ‌بزرکاوی و دابەزینی چڕیی هۆش (تەرکیز). بەڵام بە دێژەکێشانی ماوەی کەمخوێنییەکە بە نیشانەگەلی تایبەتی وەک نوشتانە‌وە‌ی نینۆک بە‌رە‌و سە‌رە‌وە، خۆی دەنوێنێت. شایانی باسە بۆ دیاریکردنی ئەم کێشەیە، پێویستە لە تاقیگە، پشکنین بۆ خوێن ئەنجام بدرێت. هەروەها ڕاستکردنەوەی ژەمە خۆراکییەکان و بەکارهێنانی تەواوکەری ئاسن وەک چارەسەری سەرەکی بۆ ئەم نەخۆشییە پێشنیار دەکرێت.
پێشگیری لە ڕێگەگەلێکی وەک خواردنی خۆراکیی دەوڵەمەند بە ئاسن (گۆشت، دانەوێڵە، هێلکە) یاخود بەکارهێنانی قەترەی ئاسن لە تەمەنی یەک ساڵیدا، کلیلی کۆنترۆڵکردنی ئەم هەڕەشە بێدەنگەیە. بێگومان، ئاوڕدانەوە لەم بابەتە، دەتوانێت داهاتوویەکی تەندروستتر بۆ جیلی سبەی ڕۆژی کۆمەڵگاکەمان دەستەبەر بکات.
وەرگێڕ: کیمیا بایەزیدی
هەڵەگر: ئەستێرە چابوک
دیزاین: سارا ڕەسووڵی
