زانیاریی زیاتری پۆست

نەورۆز و نێرگز پەیامی نووسەران و چالاکانی منداڵان بەبۆنەی نەورۆز و ساڵی نوێیەوە عەلی حەمەڕەشید شاعیر و نووسەری منداڵان

نەورۆز و نێرگز

پەیامی نووسەران و چالاکانی منداڵان بەبۆنەی نەورۆز و ساڵی نوێیەوە

عەلی حەمەڕەشید

شاعیر و نووسەری منداڵان

نەورۆز و نێرگز وەکوو دووانەیەکن کە هەرکات ناوی یەکێکیان دەبەین، بەخێرایی ناوی ئەوی تریشیان دێتە سەر زارمان و یەکتری تەواو دەکەن. کە نەورۆز دێت، نێرگز پێشوازیی لێ دەکات. پێکەوە دەبنە هێمایەکی لێوان‌لێو لە جوانی بۆ هاتنی وەرزی بەهار، ئەو وەرزەی کە وەرزی گەشانەوە، چالاکی، جووڵە، سەیران و خۆشی و شادییە. لە مێژەوە نەورۆز بووەتە ئەو بۆنە پڕ لە شکۆ و جیاوازییەی کە سەرجەم دەنگ و ڕەنگەکان، گشت بیروبۆچوونەکان لە بۆتەی خۆیدا بە شێوەیەکی هێندە جوان نیشان دەدات کە حەز دەکەیت هەموو ڕۆژێک نەورۆز بێت و بەو جوانییەوە خۆشییەکانی خۆمانی تێدا دەرببڕین و منداڵانی پێ گۆش بکەین. لە نەورۆزدا نێرگز لە بەرۆکمان دەدەین و سرودی ئاشتی و سەرکەوتن بە دڵی پڕ لە هیواوە دەڵێینەوە. منداڵانیش هەمیشە حەز  بە ئاشتی، ئاوەدانی، ژیانێکی خۆش و پڕ لە ئاسودەیی دەکەن تا بتوانن بە شێوەیەکی باش پەروەردە بکرێن و ببنە بنچینەیەکی پتەو، تۆکمە و بەهێز بۆ بنیاتنانی کۆمەڵگەیەکی دروست، ڕۆشنبیر و تێگەیشتوو.