ئەمڕۆ ڕوانیم خونچەی گوڵەکانی باخەکەمان پشکووتوون، دڵم خێراتر لێی دا کە بەهارە لە دەنگی شەپۆلی کانیاوەکان، لە خشە و چرپەی گەڵای دارەکان، لە گۆرانیی باڵندە بچووکەکان ترپەی دڵم خێراتر بوو کاتێک زانیم جوانترین بەهار لە چاوەکانی تۆوە دەست پێ دەکات! لەو سەرنجە وردانەی کە ڕەنگەکانی ژیان دەدۆزنەوە، لەو پەنجە ناسکانەی کە خۆڵی ئەم زەوییە دەشێلن و تۆوی خەون دەچێنن.
"بەهار گوڵێکە لە باخچەی خەیاڵەکانتان"
پەیامی نووسەران و چالاکانی منداڵان بەبۆنەی نەورۆز و ساڵی نوێیەوە
پەیام ئیبراهیم
نووسەر و شاعیری منداڵان
هەڵەگر: ئەستێرە چابوک
ئەمڕۆ ڕوانیم خونچەی گوڵەکانی باخەکەمان پشکووتوون، دڵم خێراتر لێی دا کە بەهارە لە دەنگی شەپۆلی کانیاوەکان، لە خشە و چرپەی گەڵای دارەکان، لە گۆرانیی باڵندە بچووکەکان ترپەی دڵم خێراتر بوو کاتێک زانیم جوانترین بەهار لە چاوەکانی تۆوە دەست پێ دەکات! لەو سەرنجە وردانەی کە ڕەنگەکانی ژیان دەدۆزنەوە، لەو پەنجە ناسکانەی کە خۆڵی ئەم زەوییە دەشێلن و تۆوی خەون دەچێنن.
هەر منداڵێک باخچەیەکی بەهارییە. پێکەنینەکانی وەک باران دێنە خوارەوە، پرسیارەکانی وەک تۆوی گوڵی نێرگز خۆیان لە نێو خاکی مێشکماندا دەچێنن. لە بیرت نەچێت کە نەورۆز نەک تەنها جەژنی سروشتە، بەڵکوو جەژنی سەرلەنوێ زیندووبوونەوەیە.
وەک چۆن زەوی دوای خەوێکی قووڵ، چاوەکانی دەکاتەوە، تۆش بەیانیان زوو هەستە، بە چاوێکی نوێوە بڕوانە و سەیری جیهان بکە. بەهار فێرمان دەکات کە دوای هەر زستانێک، ژیان سەرلەنوێ دەست پێ دەکاتەوە. ئەو زێدە سپییەی کە جارێک تەنیا ڕەشی و تاریکی بە سەریدا باڵی کێشابوو، ئێستا پڕە لە ڕەنگی سەوز، زەرد و سوور.
منداڵانی ئازیز، لە نەورۆزی ئەمساڵدا، با پێکەوە دەفتەرێکی نوێ بکەینەوە. با پێکەوە چیرۆکی نوێ بنووسین، نیگاری نوێ بکێشین، گۆرانیی نوێ بڵێین. با لە بیرمان بێت کە هەر یەک لە ئێمە چرۆیەکی بەهاری ئەم نیشتمانەین.
نەورۆزتان پیرۆز بێت، منداڵانی ئازیز!
پەپوولەکانی خەیاڵتان هەمیشە بەرز بفڕن.
