٢ی نیسان، ڕۆژی لەدایکبوونی هانس کریستیان ئاندێرسێن، ئەو نووسەرەی کە جیهانی منداڵی بە چیرۆکە ئەفسوناوییەکانی ڕازاندەوە. نووسەرێک کە خەیاڵی فڕاند و بە چیرۆکەکانی، دڵی گەنج و پیری کردە لانکەی بیر و هزری. لە ساڵی ١٨٠٥ی زایینی لە دانیمارک لەدایک بوو، بە بەرهەمەکانی وەک "کچی شقارتە فرۆش"، "جوجەڵە مراویی ناشرین"، "جلی نوێی پاشا" و "شاژنی بەفری" سنووری کات و شوێنی تێپەڕاند و بوو بە یەکێک لە کاریگەرترین نووسەرانی وێژەی منداڵان.
هانس کریستیان ئاندێرسێن؛ جادووگەری چیرۆکەکان
وەرگێڕ: کیمیا بایزیدی
دیزاین: سارا ڕەسووڵی
٢ی نیسان، ڕۆژی لەدایکبوونی هانس کریستیان ئاندێرسێن، ئەو نووسەرەی کە جیهانی منداڵی بە چیرۆکە ئەفسوناوییەکانی ڕازاندەوە. نووسەرێک کە خەیاڵی فڕاند و بە چیرۆکەکانی، دڵی گەنج و پیری کردە لانکەی بیر و هزری. لە ساڵی ١٨٠٥ی زایینی لە دانیمارک لەدایک بوو، بە بەرهەمەکانی وەک "کچی شقارتە فرۆش"، "جوجەڵە مراویی ناشرین"، "جلی نوێی پاشا" و "شاژنی بەفری" سنووری کات و شوێنی تێپەڕاند و بوو بە یەکێک لە کاریگەرترین نووسەرانی وێژەی منداڵان.
حیکایەتەکانی ئاندێرسێن تەنیا منداڵانە نین، بەڵکوو قووڵ و شایەنی بیرکردنەوەن. بە زمانێکی سادە و لە هەمان کاتدا مانادار داڕێژراون. ئەم چیرۆکانە، گێڕانەوەگەلێکیان لە هیوا، خەم، جوانی و ڕاستی درووست کرد کە تا ئەمڕۆش کاریگەری لەسەر خوێنەران هەیە. چیرۆکەکانی ئاندێرسێن فێری کردین کە جوانی دەکرێت لەناو جوجەڵە مراوییەکی ناشرین بشاردرێتەوە، خۆشی ئەتوانێت لە ناو ئازارەکاندا گەشە بکات و ڕاستی هەمیشە جل و بەرگی بەنرخ لەبەر ناکات.
هانس کریستیان ئاندێرسێن تەنیا چیرۆک‌بێژێک نەبوو، بەڵکوو شاعیرێک بوو کە هەستەکانی خستە ناو وشە و جیهانێکی خەوناوی، بەڵام ڕاستەقینەی وێنا دەکرد. لە دڵی خەمەوە، بڵێسەی هیوای داگیرساند و بە چیرۆکە بێ کۆتاییەکانی پیشانی داین کە میهرەبانی و خەونبینین دەتوانێت ڕێگایک بۆ زاڵبوون بەسەر دژوارییەکاندا ساز بکات. بەرهەمەکانی پڕن لە هێما و خواستن کە هێشتا تازەیی خۆی پاراستووە و لە هەموو گۆشەیەکی جیهاندا، دڵەکان گەرم ئەکات.
وەک ڕێزێک بۆ ئەم کاریگەرییە بێهاوتایە، ڕێکخراوی یونسکۆ ڕۆژی لەدایک بوونی ناو ناوە "ڕۆژی جیهانیی کتێبی منداڵان"؛ ڕۆژێک بۆ ڕێزلێنان لەو نووسەرانەی کە سیحری قسەکانیان، منداڵی ڕەنگاوڕەنگتر دەکات. لەم ڕۆژەدا، بە یادی ئاندێرسێن، با چیرۆکێک بخوێنینەوە و سەفەر بکەین بۆ ئەو جیهانەی کە بۆمانی دروست کردووە؛ ڕەنگە لەوێ، هێشتا کچێکی بچووک هەبێت کە شقارتەکانی دائەگیرسێنێت، یان جوجەڵە مراوییەک کە بە هیوای بوون بە باڵندەیەکی جواندایە. ڕەنگە لە دڵی زستانێکی سارددا، هیوایەک هەبێت کە لە چاوی منداڵێکەوە دەدرەوشێتەوە و لە چوارچێوەی دێڕەکانی چیرۆکێکدا، سیحری هەمیشەیی هەڵدەقوڵێت.
