دڵخۆشی، زایەڵەی ئەو ئاوازەیە کە لە هەواری دڵی منداڵانەوە سەرچاوە دەگرێت. ٢٠ـی ئادار، ڕۆژی جیهانیی "دڵخۆشی"، دەرفەتێکە بۆ ئەوەی جیهان بیری بێتەوە کە پێکەنینی منداڵانە، گەشاوەترین چرای هیوا و جوانترین سامانی مرۆڤایەتییە. لە دنیایەکدا کە هەردەمە بە هۆکارێک گەرد و غوباری خەم و پەژارە بە ڕوخساری مرۆڤەوە دەنیشێت، منداڵان، بە نواڕینی گەشاوە و یارییە ڕەنگاڵەکانیان، جارێکی تر بیرمان دەخەنەوە کە دڵخۆشی، ڕووداوێکی تیژتێپەڕ نییە، بەڵکوو ڕاستییەکی قووڵ و بەردەوامە لە ژیانی هەر تاکێکماندا.
ڕۆژی جیهانیی "دڵخۆشی"؛ ئاهەنگێک بۆ زەردەخەنە بچووکەکان
دڵخۆشی، زایەڵەی ئەو ئاوازەیە کە لە هەواری دڵی منداڵانەوە سەرچاوە دەگرێت. ٢٠ـی ئادار، ڕۆژی جیهانیی "دڵخۆشی"، دەرفەتێکە بۆ ئەوەی جیهان بیری بێتەوە کە پێکەنینی منداڵانە، گەشاوەترین چرای هیوا و جوانترین سامانی مرۆڤایەتییە. لە دنیایەکدا کە هەردەمە بە هۆکارێک گەرد و غوباری خەم و پەژارە بە ڕوخساری مرۆڤەوە دەنیشێت، منداڵان، بە نواڕینی گەشاوە و یارییە ڕەنگاڵەکانیان، جارێکی تر بیرمان دەخەنەوە کە دڵخۆشی، ڕووداوێکی تیژتێپەڕ نییە، بەڵکوو ڕاستییەکی قووڵ و بەردەوامە لە ژیانی هەر تاکێکماندا.
دڵخۆشیی منداڵانە تەنها بە دابینکردنی لەیستۆکی جۆراوجۆر یاخود خواردەمەنی چێژبەخش بۆیان، نابینرێتەوە، بەڵکوو زۆرجاران لە شتانێکی سادەی وەک بەیت و ڕازی پێش خەوتنی دایکان، لە گرتنی دلۆڤانانەی دەستی منداڵێک و بردنی بۆ نێو دنیای خەیاڵ و دۆزینەوە نوێیەکاندا، وەدەردەکەوێت. دڵخۆشی لە هەست بە ئاسایش، لە هەڵفڕینی خەیاڵ و، لە دلۆڤانیگەلێکدایە کە بەبێ چاوەڕوانی دەبەخشرێن.
بەڵام ئایا دنیا ئامادەی دڵخۆشکردنی منداڵانە؟ بەداخەوە لە چوار قوڕنەی ئەم دنیایەدا، زۆرن ئەو منداڵانەی کە گیرۆدەی شەڕ، هەژاری و نابەرابەرین؛ منداڵانێک کە لە مافی سروشتی "دڵخۆشی'' بێبەش کراون. ڕۆژی جیهانیی دڵخۆشی تەنها ئاهەنگێک نییە، بەڵکوو بیرهێنانەوەی ئەو بەرپرسیاریەتییەشە کە بەرامبەر بە جیهان هەمانە، جیهانێک کە پێویستە بە پێکەنین و هیوا بۆ منداڵانی بڕازێنینەوە.
چراوۆک، وەک سەکۆ و ماڵپەڕێک بۆ منداڵان، هەوڵ دەدات به بڵاوکردنەوەی شیعر، چیرۆک و ناوەڕۆک‌گەلی داهێنەرانە، بەرپرسیاریەتی خۆی لە پەروەراندنی خۆشی و خەیاڵی منداڵاندا بەجێ بهێنێت. دڵخۆشی تەنها هەستێک نییە، بەڵکوو هێزێکە کە دەتوانێت داهاتوو گەشاوەتر بکات. وەرن با بە چێکردنی جیهانێکی میهرەبان‌تر، منداڵەکانمان لەم جەژنەدا بەشدار بکەین، چونکە هەر زەردەخەنەیەکی منداڵ، چراوگێکە بۆ داهاتووی مرۆڤایەتی.
وەرگێڕ: کیمیا بایەزیدی
هەڵەگر: ئەمیر تازیک
