خۆشەویستیی نەتەوە و نیشتمان، سروشتی جوانی کوردستان، جلوبەرگی کوردی، ئاهەنگ و سەما و هەڵپەڕکێ و گۆرانی و مۆسیقای کوردی، سروودی نەتەوەیی و شێعر و پەخشان و خواردەمەنی و نەریتی کوردەواریی تێکەڵ بە سەوزە و ڕێواس و کنگەر و گۆزروان و چوالە و خۆراکگەلی سرووشتی و گیایی هەمەچەشنی ئەم خاکە پیرۆزەمان، لە ئامێزی سروشتی جوانی ڕەنگاڵەی نیشتمان، لە چیا و پێدەشتی، لە چۆم و کانی و ڕووباری، لە گوند و لە شاری و هەموو ئەم بەها بەنرخانە؛ نەورۆز دەیکاتە دیاری و لەبیرەوەریماندا دەبێتە یادگاری.
نەورۆز و منداڵانی کورد
پەیامی نووسەران و چالاکانی منداڵان بە بۆنەی هاتنی بەهار و نەورۆزەوە
ئاکۆ محەمەد سابیر/ سوئید
نووسەری منداڵان
خۆشەویستیی نەتەوە و نیشتمان، سروشتی جوانی کوردستان، جلوبەرگی کوردی، ئاهەنگ و سەما و هەڵپەڕکێ و گۆرانی و مۆسیقای کوردی، سروودی نەتەوەیی و شێعر و پەخشان و خواردەمەنی و نەریتی کوردەواریی تێکەڵ بە سەوزە و ڕێواس و کنگەر و گۆزروان و چوالە و خۆراکگەلی سرووشتی و گیایی هەمەچەشنی ئەم خاکە پیرۆزەمان، لە ئامێزی سروشتی جوانی ڕەنگاڵەی نیشتمان، لە چیا و پێدەشتی، لە چۆم و کانی و ڕووباری، لە گوند و لە شاری و هەموو ئەم بەها بەنرخانە؛ نەورۆز دەیکاتە دیاری و لەبیرەوەریماندا دەبێتە یادگاری. ئەم بۆنە نەتەوەییە، لە تەک کۆمەڵێک گەمە و یاریی فۆلکلۆری کوردەواریدا، هەموو ساڵێک نوێ دەکەینەوە و کوردبوون وخۆشەویستیی خاك و ئاوی زێدی داپیرە و باپیرانمان، بەو جۆرەی خۆمان بەنوور و ڕۆشنایی بڵێسەی ئاگری نەورۆز گۆشکراوین، بەو جۆرەش، منداڵەکانمان پەروەردە دەکەین و بەجلوبەرگی ئاڵ و واڵای کوردییەوە دەیانڕازێنینەوە، تا ئەوانیش نەوە لە دوای نەوە، بەهەمان جۆش و خرۆشەوە ئاهەنگی نەورۆز پیرۆز بکەن.
