کە شاخ و دەرودەشت، جلوبەرگی سپی زستانە دەگۆڕن و جلێکی سەراپا سەوز دەپۆشن و خۆر پرشنگە ئاڵتونییەکانی خۆی بەسەریاندا پەرش و بڵاو دەکاتەوە، گوڵە نێرگز سەر دەردەهێنێت و هاتنی بەهار لە چاوی گوڵە نێرگزەوە بە جوانی دەبینی. خونچە گوڵە ناسک و سادەکانی دار چوالەکان دەپشکوون و ئەودەمە تامەزرۆی کە گیرفانەکانت پڕ بکەیت لە چوالە و بەدوای پەپولەکاندا دەگەڕێی تا یارییان لەگەڵدا بکەیت و لەبەردەم هێلانە پەڕەسێلکەکەی هەیوانەکەتاندا بە هێمنی سەرنج دەدەیت تا دایکە پەڕەسێلکەکە باسی چیرۆکی کۆچە دوورودرێژەکەی خۆیت بۆ بکات و تۆش بە پەرۆشەوە بۆ هاوڕێکانتی بگێڕییەوە.
نێرگز. موژدە و نوقڵانەی هاتنی بەهارە
پەیامی نووسەران و چالاکانی منداڵان، بە بۆنەی هاتنی بەهار و نەورۆزەوە
ئەرسەلان حەسەن
نووسەری منداڵان
کە شاخ و دەرودەشت، جلوبەرگی سپی زستانە دەگۆڕن و جلێکی سەراپا سەوز دەپۆشن و خۆر پرشنگە ئاڵتونییەکانی خۆی بەسەریاندا پەرش و بڵاو دەکاتەوە، گوڵە نێرگز سەر دەردەهێنێت و هاتنی بەهار لە چاوی گوڵە نێرگزەوە بە جوانی دەبینی. خونچە گوڵە ناسک و سادەکانی دار چوالەکان دەپشکوون و ئەودەمە تامەزرۆی کە گیرفانەکانت پڕ بکەیت لە چوالە و بەدوای پەپولەکاندا دەگەڕێی تا یارییان لەگەڵدا بکەیت و لەبەردەم هێلانە پەڕەسێلکەکەی هەیوانەکەتاندا بە هێمنی سەرنج دەدەیت تا دایکە پەڕەسێلکەکە باسی چیرۆکی کۆچە دوورودرێژەکەی خۆیت بۆ بکات و تۆش بە پەرۆشەوە بۆ هاوڕێکانتی بگێڕییەوە.
بەهار لە چوونە سەیراندا دەبینی کە لەوێ وەک کارژۆلەیەک بەناو گژوگیای دەشتەکەدا ڕاکە ڕاکتە و لەبەرخۆتەوە گۆرانی بۆ بەهار و نێرگز و گوڵ و ئاشتی دەڵێیتەوە، لەو چرکە ساتەدا بەهار دەبینی کە گڵۆڵەی دەزووی کۆلارەکەت دەکەیتەوە و هەڵی دەدەیت و خۆزگە دەخوازیت ئەوەندە بەرز ببێتەوە و بفڕێت، تا دەگاتە قووڵایی ئاسمان و کە هاتیشەوە گوڵەئەستێرەیەکت لەگەڵ خۆیدا بەدیاری بۆ بهێنێتەوە.
یان ئەو کاتەی لەگەڵ منداڵەکانی هاوڕێت دەچیتە گەشت و گەڕان و لەژێر پیرە داربەڕووەکە هەموو ئەو یارییانە دەکەن خۆشی و وزەتان پێدەبەخشێت و جیهانێک دەخوڵقێنن پاک و بێگەرد وەک کانییەکی ڕوون و جوانی بەر تریفەی مانگەشەو، وەک چاوی قڕژاڵ، پاک و بێگەرد و سپی وەک بەفری یەک شەوە کە کلوو کلوو لە ئاسمانەوە بەسەر دار و درەخت و زەویدا داباری بێت و بووکەڵەبەفرینەیەکتان لێ دروست کردبێت.
بەهار لە دەشتە پڕ لە گوڵاڵە سوورەکاندا دەبینی، لە گوڵە جوتێرە و گەزیزەدا، لە خواردنی دۆری و ڕێواسی مزر، مزر وەک هەڵوژە ترشەی بەهارەدا دەبینی.
نەرۆزتان پیرۆز
