یاری، کایە و گەمە لەو دیاردە کۆمەڵناسییانەیە کە منداڵان، لەو ڕێگایەوە بەشێوازێکی ڕاستەوخۆ، جیهان ئەزموون و تاقی دەکەنەوە. بیرمەندێکی وەکوو پیاژە گەورە دەروونناسی سەردەم، لەو بڕوایەدایە کە"یاری زمانی منداڵانە" و ئەوان بەپێی یارییەکانیان شوناسی خۆیان و جیهانی تاکەکەسییان دەخولقێنن. بۆیە لە یاری وەکوو بناغە‌ی پێکهاتە زانستییەکان دەڕوانێت و، پێی وایە بەبێ گەمە کردن هەست و سۆزی ئەوان گەشە نەکات.
"سترانگەمە"
هۆنراوە:جەبار شافعی زادە
شێوەکار:سۆلا باتمانی
چاپەمەنیی:ڕێگا
یاری، کایە و گەمە لەو دیاردە کۆمەڵناسییانەیە کە منداڵان، لەو ڕێگایەوە بەشێوازێکی ڕاستەوخۆ، جیهان ئەزموون و تاقی دەکەنەوە. بیرمەندێکی وەکوو پیاژە گەورە دەروونناسی سەردەم، لەو بڕوایەدایە کە"یاری زمانی منداڵانە" و ئەوان بەپێی یارییەکانیان شوناسی خۆیان و جیهانی تاکەکەسییان دەخولقێنن. بۆیە لە یاری وەکوو بناغە‌ی پێکهاتە زانستییەکان دەڕوانێت و، پێی وایە بەبێ گەمە کردن هەست و سۆزی ئەوان گەشە نەکات.
لە کۆمەڵگەی کوردیدا وەکوو نەتەوەکانی تر، یاری ڕۆڵێکی هەرە گرنگی لە پەروەردەی زمان و بیروهزری منداڵاندا هەبووە و، زۆریان هەڵداوە هەتا لە ڕێگای یارییەوە لەگەڵ نهێنییەکانی جیهاندا ئاشنایان بکەنەوە. وەک چۆن فەیلەسووفێکی وەکوو هایدیگر دەڵێت: "زمان یانەی بوونە"، بۆ منداڵانیش "یاری یانەی بوونە" و بەبێ کایە کردن هیچ منداڵێک تا ڕادەی پێویست گەشە ناکات و پەروەردەیەکی پەسەندکراوی نابێت.
لە سترانگەمەدا، ۱۱ یاریی منداڵان بە پشت بەستن بە سترانێکی ساکار داڕێژراون، کە سەرەڕای ئەوەی بە شێوازێکی ڕاستەوخۆ منداڵان دەباتە بازنەی یارییەکانەوە، هەتا لەو ڕێگایەوە ڕۆڵی خۆیان وەکوو ئەندامێکی کارامە لە کۆمەڵگەدا بگێڕن. هەروەها ناڕاستەوخۆش لەگەڵ چەمکی سرووشت پارێزی ئاشنایان دەکاتەوە و هانیان دەدات هەتا ڕێز لە هەموو تۆم و ماکەکانی سرووشت بگرن و شانازی بەوە بکەن کە بەنرخترین خۆشەویستی، خۆشەویستی سرووشتە.
خاڵێکی تری جێی سەرنجی سترانگەمە ئەوەیە کە، شێوەکاریی لەئەستۆی سۆلا باتمانی کچێکی تەمەن ۹ ساڵدا بووە، کە براوەی خەڵاتی شێوەکاری "فستیڤاڵی نەتەوەیی ئەدەبیی منداڵانی شوناس"ە، کە عەلیڕەزا گوڵدوزیان گەورە شێوەکاری کاندیدی خەڵاتی نێونەتەویی ئەندێرسون وەکوو سەرۆکی لێژنەی هەڵسەنگاندنی شێوەکارییەکان، بەرپرسیاریەتی لەئەستۆ بووە.
