بە لەبەرچاوگرتنی گرینگایەتی وەشانی کتێی منداڵان و مێرمنداڵان بە زمانی کوردی و پاڵپشتی لە نووسەران و وەرگێڕانی خوازیاری ئەدەبی منداڵان و مێرمنداڵانی کورد، یەکەمین وەشانگەی تایبەتی ئەدەبی منداڵان و مێرمنداڵان بە زمانی کوردی، هاتۆتە بواری چاپەمەنیی تایبەت بە منداڵان و مێرمنداڵان.
یەکەمین وەشانگەی تایبەت بە منداڵان و مێرمنداڵان بە زمانی کوردی مۆڵەتی دەست بەکاربوونی وەرگرت.
وەشانگەی “پەپوولە” یەکەمین وەشانگەی تایبەتی ئەدەبی منداڵان و مێرمنداڵان بە زمانی کوردی لە ڕۆژهەڵاتی وڵاتە کە لەمساڵدا مۆڵەتی چالاکیی وەرگرت.
ئارش مێهرەبان، سەرنووسەر و بەڕێوەبەری جێبەجێکاری وەشانگەی “پەپوولە” لە وتووێژێکدا لەگەڵ هەواڵنێریی ئیبنا لە کوردستان وتی:” بە لەبەرچاوگرتنی گرینگایەتی وەشانی کتێی منداڵان و مێرمنداڵان بە زمانی کوردی و پاڵپشتی لە نووسەران و وەرگێڕانی خوازیاری ئەدەبی منداڵان و مێرمنداڵانی کورد، یەکەمین وەشانگەی تایبەتی ئەدەبی منداڵان و مێرمنداڵان بە زمانی کوردی، هاتۆتە بواری چاپەمەنیی تایبەت بە منداڵان و مێرمنداڵان.
ئەو درێژەیدا: وەشانگەی تایبەتی “پەپوولە” وەکوو یەکەمین ناوەندی چاپ و بڵاو کردنەوەی کتێبی تایبەت بە منداڵان و مێرمنداڵان بە زمانی کوردی، بە مۆڵەتی فەرمی و بە بەرپرسیاریەتیی فاتمە ئیبراهیمی، چالاکیی خۆی دەست پێکردووە.
ئەو بە ئاماژەی بەوەی کە “پەپوولە” بە لەبەرچاوگرتنی پێویستی و بوونی وەشانگەیەکی سەربەخۆ و تایبەت کە بتوانێت لە چوارچێوەی ئەدەبی منداڵان و مێرمنداڵاندا چالاکی بنوێنێت، هاتۆتە چوارچێوەی چاپ و وەشانی کتێبی منداڵانەوە، هیوای دەربڕی کە ئەم وەشانگەیە بتوانێت بە پاڵپشتیی لە نووسەران، شاعیران و وەرگێڕانی لێهاتووی کورد، دەست بداتە خولقاندنی بەرهەمی بەپێزی ئەم بوارە گرینگە.
مێهرەبان لە پەیوەندی لەگەڵ ئامانجی داهاتووی وەشانگەدا وتی:” وەشانگەی “پەپوولە” بە کەڵک وەرگرتن لە توانست و تەجروبەی مامۆستایانی زانکۆ، دەرچووانی زانستگایی بەشەکانی دەروونناسی و زانستە مرۆییەکان، دەرچووانی و کارناسانی بەشی زمان و وێژەی کوردی، لە هەوڵدایە بە شێوازێکی پسپۆڕانە و زانستی، بەرهەمی نووسەران و وەرگێڕانی کورد هەڵسەنگێنێت و لە ئەگەری پەسەندکردنیان، چاپ و بڵاویان بکاتەوە. پاڵپشتی لە نووسەران و بە تایبەت نووسەرانی لاوی بەشی ئەدەبی منداڵان و چاپی بەرهەمی بەپێزیان، لەو ئامانجانەیە کە وەشانگە بە دوایەوەیەتی.
ئەو زیادی کرد: بە زوویی و لە داهاتوویەکی نزیکدا یەکەمین بەرهەمی چاپیی وەشانگە دێتە ناو بەرهەمە خولقێندراوەکانی تایبەت بە کتێبی منداڵان و مێرمنداڵان بە زمانی کوردی و هیوادارین بتوانین بە کەڵک وەرگرتن لە متمانە و هەوڵی نووسەرانی ئەدەبی منداڵان و مێرمنداڵان، وەرزێکی نوێ لە بەشی چاپەمەنیی کتێبی منداڵاندا بێنینە ڕسکان.
